Home View News Articles BITLA MAIPAPAN ITI KASASAAD TI MUNISIPYO

BITLA MAIPAPAN ITI KASASAAD TI MUNISIPYO

Rinuggian tayo a rinambakan ti Baro a Tawen babaen ti Baggak Festival ken iti 429th Foundation Anniversary iti ipatpateg tayo nga ili a Bauang. Naimatangan tayo bayat iti baro a tawen no kasano a naipatangatang dagiti luses ken paputok a nangipakita iti nam-nama ken kararag tayo para iti natalna ken nabunga a 2015.


Bise Mayor Bonifacio Malinao, Sr., dagiti kakaduak iti Sangguniang Bayan, kadagiti tallopulo ken siyam (39) a Punong Barangay, Admininistrador kadagiti Pagadalan, mangidadaulo kadagiti ‘Attached National Agencies’, mangidadaulo kadagiti departamento ehekutibo, dagiti agtagikua ken mangimaton iti agduduma nga establisiemento iti negosio, gagayyem manipud iti media, kadakayo amin, kablaawan kayo iti naimbag a bigatyo.


No adda nagdumaanna iti State of the Municipality Address a naipaay kadakayo iti kallabes, ita a tawen idanon tayo daytoy iti barangay ken iti komunidad. Kiniddaw tayo ti kaadda ita dagiti ‘partners’ tayo manipud iti pribado a sektor, agtagikua iti negosio, religious groups, ken dagiti civil society organizations. Kayat tayo a maimatanganyo no ania iti ar-aramiden tayo a mangparang-ay iti ili, kagiddan iti panangipaayyo ti partisipasion ken panang-suportaryo iti agduduma a programa ken proyekto iti gobierno–lokal tayo. Mainaig iti daytoy, napilimi nga angayen ti SOMA ita a tawen kabayatan iti Gobyernong Abot Ang Barangay, wagas a panangidanon, panangipaay ken panangyasidegmi iti serbisio ti gobierno para kadagiti tattao.

Ti napalabas a tawen, napaneknekan a nabunga ken naprogreso daytoy para iti ili tayo a Bauang ken saanko a naaramid a sisiak daytoy a naindaklan a trabaho. Kayatko nga iyawat iti naimpusoan a panagyamanko kadakayo amin nga adda ditoy gapu iti awan patinggana a suporta ken talek nga impaayyo kaniak. Dakayo ti pigsa ken inspirasion a namagtignay kaniak ken nangpatibker iti liderato a naipakitak kadagiti naglabas a taw-tawen.


Rumbeng ken nasken laeng a mapakaammuan kayo no ania dagiti ‘nagappuanan’ tayo (acomplishments) para iti tawen 2014. Addaan karbengan ti tunggal umili iti daytoy a munisipio a mapakaammuan no ania iti naaramidan dagiti lideryo tapno dumur-as iti kabibiag ti tunggal Bauangenio.


Arapaap tayo a pagbalinen ti ili a Bauang nga “investment-friendly” wenno lugar a kasayaatan ken nagayyem a pagibangonan iti negosio, lugar a pagturongan dagiti turista iti Amianan a Luzon, munisipalidad a natalged, nadalus ken adu’t mulana a kay-kayo ken agduduma a produkto, pagtaengan dagiti nasalun-at ken addaan-adal a Bauangenios a kabaelanna ti maki-kompetensia iti tay-ak ti agrikultura iti sangalubongan. Daytoy ti nalinteg a dalan iti panangimaton ti gobierno a resulta iti konsultasion ken panagtitimpuyog iti nagbabaetan ti gobierno-lokal, dagiti mangibagi kadagiti opisina ti gobierno nasional ken peoples’ organizations kabayatan iti naangay a Municipal Development Strategy Planning Workshop idi bulan ti Mayo.


Sakbay nga agsaritaak maipanggep ti detalye dagiti nagappuanan wenno accomplishments ti agduduma a benneg iti panangimaton wenno governance, maragsakanak unay a mangibingay kadakayo kadagiti ‘bunga’ iti natrabahuan tayo.


Iti biang ti Salun-at ken Nutrision, ipannakkelmi nga ipakaammo kadakayo a nagun-od tayo ti maikatlo a Red Orchid Award a nakaisagpatan itan ti Bauang iti ‘Hall of Fame’. Kangrunaan ti amin, alaek daytoy a kanito nga agkiddaw iti panangipanamnamayo nga agtultuloy a suportaranyo ti Anti-Smoking Campaign tayo.


Nabigbig tayo met itay napan a tawen a “Mobile Blood Donation Champion” ditoy La Union gapu iti boluntario a panagi-donar tayo iti dara a nangipanamnama iti supisiente ken natalged a suplay ti dara, malaksid laeng iti resonable a presyo daytoy. Kas impadamag ti Philippine Red Cross ken Ilocos Training and Regional Medical Center (ITRMC), ngimmato ti panagkasapulan iti natalged (safe) a dara a mamagsilpo ti biag dagiti agkasapulan. Tapno maibangon ti dakdakkel a suporta iti komunidad nangbukel tayo iti ‘Memorandum of Understanding’ kadagiti amin a Punong Barangay tapno agtitinnulong tayo iti daytoy a programa. Padayawak met ni Vice-Mayor Bonifacio Malinao Sr., SBM Napoleon Dumo iti naipaay da iti naanayas nga igaganuat daytoy a programa.


Agsipud iti dakkel unay a pakaseknan ti ili iti risgo ti didigra a sumangsangbay (disaster risk) ken panagbalbaliw iti panawen (climate change), imbaklay tayo ti karit a papigsaen ti Disaster Risk Reduction and Management Council babaen ti ‘panangsanay’ ken panangipaay iti adal ken impormasion kadagiti service providers ken dagiti residente agraman panakaidur-as ti Crisis Operation and Management Center babaen ti panangidestino kadagiti tao a tumulong bayat iti tiempo ti kalamidad. Kas idi Pebrero 6,2015, inawat iti Bauang Life Saving Team ti “Bannuar iti Amianan 2014 Award manipud iti Office of Civil Defense Region I gapu iti naisangsangayan a suporta ken dedikasionda kabayatan kadagiti ‘disaster ken emergency operations’ itay napan a tawen.


Iti biang ti ‘sisterhood relations’ wenno pannaki-kinnabsat iti ganganaet a siudad, datayo iti nangsangaili bayat iti agduduma nga okasion kadagiti opisyal iti Taebaek City, Gangwon Teachers Choir, Jeongseon Arirang Cultural Foundation ken Habitat for Humanity iti South Korea.


Kas paset iti pinakisinnukan-sukat tayo iti kultura, naawis ti Baggak Choir a makidanggay iti 32nd Taebaek National Choir Competition idi Agosto. Kabayatan iti dayta a panagsarungkar tayo idiay South Korea, napapigsa ti munisipalidad tayo ti ‘friendship city ties’ iti Taebaek City ken agtultuloy met iti panakaipagna ti pannaki-kinnabsat tayo iti Jeongseon, Gangneueng ken Sokcho Counties a masarakan iti probinsia ti Gangwon, South Korea.


Iti edukasion, ti kinapudnona naipaay tayo ti supisiente a suporta babaen ti panakaaramat ti Php22, 627,916.45 manipud iti Special Education Fund a nausar iti panangtarimaan ken panang-pasayaat kadagiti pasdek iti eskuelaan, sueldo dagiti LSB teachers, school supplies, panaggatang kadagiti materiales ken daduma pay a mausar para iti edukasion, scholarship program, skills development training, panangital-o iti arte ken kultura ken panangidur-as iti sports. Naruggian metten iti panakaibangon ti pasdek iti Alternative Learning Center idiay Barangay Central West nga agbalin a lugar para iti ‘skills development’ wenno panangidur-as iti abilidad dagiti kailian tayo’ ken pakaadalan kadagiti wagas iti panangirubbuat kadagiti proyekto a makaipaay pagsapulan. Nupay adu dagiti pasilidad iti eskuelaan tayo a masapul a mapasayaat, pattiek a madaman iti panagprogreso ti gandat tayo a mangipaay iti dekalidad nga edukasion kadagiti annak tayo, ken namnamaenyo nga ti edukasion ti maysa kadagiti prioridad iti lokal a gobierno.


Maysa pay, napadayawan ken nagun-od ti ili tayo iti 2014 Seal of Child Friendly Local Governance manipud iti DSWD Council for the Welfare of Children gapu iti panagtignay tayo a nangidur-as ken nangsalaknib iti karbengan ken pagimbagan dagiti ubbing.


Nagbalin tayo met a Provincial Awardee manipud iti Technical Education and Skills Development Authority (TESDA) para iti “Search for 2014 Kabalikat Awards” gapu iti suporta iti panaka-ital-o ti promosyon ken panagdur-as ti kababalin dagiti addaan paglaingan (skills), abilidad, umno a panagug-ugali ken pammati.


Itay napan a tawen, 2014, nakipartisipar ti ili a Bauang iti National Competitiveness Council’s Cities and Municipal Competitiveness Index ken manipud iti 399 a munisipalidad, nadanon ti ili tayo a Bauang ti maika-54 a rangko iti tay-ak ti napigsa nga ekonomia (economic dynamism), naballaigi a panagituray (government effectiveness), ken panagipasdek kadagiti ‘infrastraktura’. Maibilang daytoy a pagilasinan nga adda tayo iti umno a direksion iti panaggunay tayo tapno umadu dagiti umay agpuonan ditoy Bauang.


Napapigsa tayo ti kooperasion ken timpuyog iti Local Government Unit, Non-Governmental Organizations, ken Civil Society Organizations (LGU-NGO-CSO) para iti agduduma a tulong –pinansial. Ti National Grid Corporation of the Philippines (NGCP) nangipasdek ken impa-imadan ti tallo a classroom building para iti Sta. Monica Elementary School. Ti Aklat, Gabay, Aruga Tungo sa Pag-angat at Pag-asa (AGAPP) Foundation nga idadauloan ni Ms. Pinky Aquino Abelleda, nangidonar iti dua a classroom building a pinanagananda iti “Silid Pangarap” ditoy Paringao Elementary School. Inrubbuat met ti PLDT iti Infotech Program da para kadagiti agduduma a pagadalan. Babaen daytoy a programa, nang-ited ti PLDT iti computer ken materiales iti panagisuro para kadagiti manursuro ken iti eskuelaan.


Babaen ti Bangju Mission Center nga indauloan ni Senior Pastor Rev. Kwan Kim, immay ditoy ili tayo ti grupo dagiti Korean doctors a nangi-ganuat iti ‘medical mission’ ken nagibunong iti anteohos (eyeglasses) a nakairanudan iti ginasut a residente. Adda met ti dua a doktor manipud iti Patton Medical Hospital iti Estados Unidos, a nangi-ganuat iti libre a konsultasion-medikal kadagiti pasiente nga addaan problema iti panagpampanunot.


Impatakder ken inyawat ti Weather Philippines Foundation, Inc., ti Automated Weather Station (AWS) para iti munisipalidad. Kasapulan ti AWS iti panagplano ken panagaramid iti pakauna nga addang kada dumteng iti dakes a panawen kas iti panagsangbay ti bagyo. Nagkari met ti Globe Telecom a mangipaay iti 10 a Closed Circuit Television Camera para iti Farmers Trading Center a makatulong iti panangwanawan kadagiti aktibidades iti nasao a sentro iti ekonomia.


Nagasat ti Bauang ta nagbalin a maysa kadagiti pilot municipalities para iti E-Bayanihan Disaster Reporting System ken E-Hatid National Database Health Information System, agpada a proyekto iti Ateneo de Manila University.


Sipapannakkelak a mangibaga a napapigsa tayo ti partisipasion ti pribado a sektor babaen ti panag-miembroda kadagiti grupo ken komite iti munisipio a tumulong iti panagrang-ay ti turismo ken dagiti addang a mangital-o wenno promosion ti ili.


Inikkan tayo ti naan-anay a tulong ken gundaway dagiti ‘peoples’ organizations a mangbuangay kadagiti proyekto a makatulong a mangkissay ti problema iti kinakurapay maibasar iti pagkasapulanda. Daytoy ti rugi iti panakaaramid ti Poverty Reduction Action Plan a pinundoan iti Bottom-up Budgeting Program iti gatad a Php 15-M. Dagiti naawat a pammadayaw(awards) ken panakabigbig (recognition) tayo iti mangpaneknek ti panagsangsangkamaysa tayo a kas maysa a komunidad nga agta-trabaho agturong iti progreso ken panagdur-as.


Iti sektor ti Administrative Governance. Gapu iti naannayas a panagkakadua ti Executive ken Legislative bodies, 261 a resolusion ken 16 nga ordinansa iti nabukel ken naaprobaran. Maibilang ditoy ti Ordinance No. 02 Series of 2014 – Panakaipalubos iti panangibangon ken panangusar iti ‘provident fund’ pabor kadagiti rehistrado a tricycle drivers ken owners ditoy ili tayo; Resolution No. 107- nang-approbar iti pundo a Php 500,000.00 para iti panglakagan (livelihood), salun-at (health), seguridad (security) ken pundo iti edukasion pabor iti Tricycle Operators/ Drivers Association.


Adda met iti Ordinance No.7 Series of 2014 – Panangilatang iti pundo para ti implementasion iti Local Anti- Criminality Action Plan (LACAP) iti Bauang Police Station a maawagan “Tugis Bawal Droga”. Daytoy nga ordinansa iti makaigapu ti panaka-kumpiskar dagiti iligal a droga ken panakaaresto dagiti personalidad a karaman iti panagraira ti maiparparit a droga a rason iti panakadadael iti pamilia ken biag, nangruna dagiti agtutubo.

Kasta met iti Resolution No. 101 –Ordinansa a panangi-ganuat iti ‘expropriation proceedings’ kadagiti amin a lote a maapektaran iti singasing a proyekto seknan iti panangpalawa kadagiti kalsada iti ili (municipal road widening project).


Babaen ti puersa iti 62 a pulis nga adda iti liderato ni PCI Benjamin Diagan,Jr., saan pay a nagun-od ti lokal a gobierno ti ‘ratio’ a maysa a pulis kada 1,000 a tattao. Nupay kurang pay laeng iti bilangda, nai-trabaho dagiti pulis a pagtalinaeden a natalna ken naurnos ti komunidad tayo. Maibilang iti ballaigi dagiti pulis ti panakai-ganuat ti 17 nga Anti-Illegal Drugs Operations a nakatiliwan iti 23 a personalidad iti droga ken panaka-kumpiskar dagiti agduduma a drug paraphernalia agraman shabu. Manipud idi naimplementar ti Anti-Criminality Action Plan- Tugis Bawal na Droga ken panangi-rubbuat manen ti Bauang Ayaw sa Droga (BAD). Agosto 7, itay napan a tawen, naorganisar ti Barangay Anti- Drug Abuse Councils (BADACs) kagiddan iti panakaangay dagiti seminar seknan iti iligal a droga babaen ti pannarabay iti Philippine Drug Enforcement Agency (PDEA) ken napapigsa met ti kampania iti panangidanon kadagiti impormasion (information dissemination campaign) babaen iti panakaangay iti agtultuloy a “Pulong Pulong” kadagiti barangay.

Nagtalinaed ti Bauang a natalged (safe) ken nakappia nga ili. Gapu iti daytoy, naala tayo ti rikna ken talek dagiti agpupuonan (investors) a tumulong iti panangparang-ay ti ekonomia iti ili tayo.


Nagtultuloy a naisayangkat dagiti “Capability-Building Program” para kadagiti empleado. Babaen iti daytoy a programa, naipatulod dagiti empleado kadagiti serye ti panagsanay ken seminar tapno lumawa ti panangawat ken kapabilidad da iti serbisio a mamagbalin kadakuada nga epektibo iti panangi-patungpalda kadagiti rebbengen ken trabahoda.


Iti benneg ti tulong a naipaay ti gobierno –lokal para iti trabaho, dua a lokal a ‘job fairs’ iti naangay, 49 dagiti aplikante iti ballasiw taaw ken 63 dagiti aplikante iti trabaho ditoy ayan tayo, 16 dagiti ‘on the spot’ a naawat iti trabaho. Itay napan a tawen, adda iti 42 a ‘fresh graduates’ nga in-empleo ti ABONO Partylist ken ni Congressman Franny Eriquel iti babaen ti Government Internship Program (GIP) a nangnayon iti bilang dagiti empleado iti Local Government Unit. Adda met iti 64 nga estudiante a nagtrabaho iti sidong ti Special Program for the Employment of Students (SPES) idi tiempo iti summer.


Naidanon ti nain-gimongan a serbisio kadagiti umili, nangruna iti para salun-at ken kasapulanda a taraon. Adda ti pakabuk’lan a 16,780 nga umili iti naipaayan ti serbisio-medikal ken libre a konsultasion kabayatan iti binulan a Gobyernong Abot Ang Barangay Program (GABAY) agraman dagiti ‘walk-in patients’ iti Rural Health Unit ken Lying In Clinic. Agdagup iti 3,200 dagiti pasiente a naipaayan iti dental services.


Inyangay tayo met ti nagsasaruno nga ‘information education campaign’ iti agduduma a barangay a nagresulta iti pito (7) a daras a mobile blood donation a nakipartisiparan dagiti umili iti barangay ken dagiti miembro iti nadumaduma nga organisasion a kas blood donors. Adda ti pakabuk’lan nga 434 bags ti dara a naurnong babaen ti pinakitinnulong iti Philippine Red Cross ken ITRMC. Barangay Palintucang, Bucayab ken Cabalayangan, dagiti barangay nga addaan ti kaaduan a bilang iti nangidonar iti dara.


Itay napan a tawen, pinapigsa tayo ti kampania iti ‘anti-rabies’ tapno ma-kontrol ti insidente ti panagkagat ti aso. Iti agdama, adda ti agtultuloy a panagbakuna ken rehistrasion dagiti aso kadagiti barangay.


Idiay Dona Corazon Ortega Lying In, Geriatrics and Therapeutic Center, adda iti nai-rehistro a 184 a naiyanak a maladaga, ad-adu ngem idi 2013 nga dimmanon iti 168 livebirth deliveries. 87 kadagiti naipasngay idi 2014 ti naipasidong iti “newborn screening”.


Iti Ligtas Tigdas campaign iti Department of Health, 72.1 % dagiti ubbing a nabakunaan iti Anti-measles rubella ken 69.2% dagiti naikkan ti oral polio vaccine.


Iti uneg ti nagsasaruno a tallo a tawen, intultuloy tayo iti nakitimpuyog (partnership) ti Jollibee Foundation iti sidong ti Busog, Lusog, Talino School Feeding Program a nakairanudan dagiti 160 nga elementary school pupils. Babaen ti daytoy, bimmassit ti bilang dagiti nakakapsut ken nakukuttong nga ubbing.


Kas paset iti panangital-o ti nasalun-at a biag, dakayo amin a kailiak, awisen kayo iti ‘zumba aerobics session’ nga rinugian tayo idi bulan ti Nobiembre, kada bigat iti Sabado idiay Plaza. Sabali laeng daytoy kadagiti nadumaduma nga aktibidades iti ‘sports’ para iti salun-at nga maipapaay kadakayo.


Pattiek nga edukasion ti tulbek iti progreso ken panagdur-as. Gapu iti daytoy, agtultuloy ti suporta a mait-ted iti programa ti edukasion. Mangipaneknek ditoy ti panakaibangon ken panakatarimaan dagiti pasilidad ti edukasion pakaibilanganen dagiti ‘farm to school roads’. Maibilang ditoy ti panangpasayaat iti Bauang Sports Oval idiay Bauang North Central School; panangpa-pintas iti dua (2) a classroom building idiay Eulogio Clarence de Guzman Junior Memorial National Vocational High School ken panakabangon ti computer room; konstruksion iti maysa a classroom building idiay Eulogio Clarence de Guzman Jr. Memorial Elementary School ken panangibangon iti alad ti aglikmut iti Paringao National High School. Maipatarimaan met ti Grade 6 ken kindergarten classroom building idiay Pugo Elementary School.

Napasayaat met ti Multi-Purpose Covered Court idiay San Agustin Elementary School. Naibangon tayo ti kabite wenno ‘riprap’ iti Casilagan Integrated School. Pakabuk’lan a pundo a Php 9,875,673.04 manipud iti Special Education Fund iti naaramat a panangibangon, panangtarimaan ken panangpasayaat kadagitoy a pasilidad ti edukasion ken dagiti ‘farm to school roads’. Adda met iti pundo a Php 500,000.00 a nailatang para iti ‘literacy’ wenno panagadal a maigiddan iti livelihood projects iti sidong ti Alternative Learning System (ALS).


Ti Bauang iti kaaaduan iti ALS Accreditation and Equvalency Test Program Passers ditoy entero a La Union iti napalabas a 5 nga tawen. Adda iti 102 passers nga nagturpos idi 2014.


Nang-empleo met ti LGU, babaen ti Local School Board, iti 75 a job orders ken LSB teachers a nagserbi a katinnulong kadagiti eskuelaan a nakai-destinoanda. Naibunong pay ti 9,640 set ti school supplies para kadagiti elementary pupils iti publiko a pagadalan.


Nasurok a Php1-Million ti naipundo para iti Scholarship Program ken Php 1,330,000.00 ti naited a tulong-pinansial para kadagiti proyekto iti DepEd mainaig kadagiti isur-suroda. Iti sidong ti Bottom-Up Budgeting Program CY2014 a punduan ti Dep-Ed, maibilang kadagiti naisingsing a proyekto ti Gulayan sa Paaralan para iti elementary schools, panangtarimaan ken rehabilitasion dagiti pasilidad iti eskuelaan para iti Acao, Bagbag, Sta. Monica ken Bauang North Central School agraman ti konstruksion iti ‘water and sanitation facilities’ para kadagiti 25 a public elementary schools.


Kabayatan iti ‘Rediscover Bauang’ a kampanya tayo, talliawen ken ukagen ‘tay manen ti nabaknang a pakasaritaan a pakaibilangan ti maysa a nalatak a mannurat ken mannaniw a ni Manuel E. Arguilla, naiyanak idiay Nagrebcan ken nangited iti naisangsangayan a kontribusion iti literatura. Nagasat tayo ta simmarungkar ti National Artist for Literature –ni Francisco Sionil Jose a nangdaydayaw kenni Arguilla gapu iti nagappuananna iti tay-ak ti literatura kagiddan iti pananglagip ti 103rd a kasangay daytoy.

Ita a tawen, itultuloy tayo iti mangukag ti pakasaritaan ti ili tayo a Bauang. Mai-dokumento amin, nakasurat man wenno saan, iti pakasaritaan ti Bauang ken maipakaammon to daytoy iti henerasion dagiti ubbing. Mangnamnama tayo a maiparang no ania dagiti naaramidan (accomplishments) dagiti nagkauna a lider ‘tay a Bauangenios a nangipatawid ti ‘dinto masubadan a kontribusion para iti progreso ti ili tayo ita nga agdama.


Adda iti 115 a marigrigat a Senior Citizens a benepisario iti ‘Social Pension’. Ti pundo, nagtaud iti Bottom-Up Budgeting nga pinunduan ti DSWD. Malaksid iti pensionda, adda dagiti naiprograma a medical missions para kadakuada. Agdagup met nasurok 1,000 a lallakay ken babbaket (elders) ti nabakunaan iti anti-flu ken anti-pneumonia.


Itay napan a tawen, sinarungkaran tayo ti tallo (3) a Centenarian, isuda Sotera Rimorin, agtawen 101, Magdalena Tangalan, agtawen 102, ken Paz Cortez, agtawen 104. Impaayan tayo ida ti Certificate of Recognition ken ‘monetary tokens’. Kada tawen, itultuloy ‘tay a bigbigen dagitoy a Centenarians ken sagutan ida iti cash incentives para kadakuada ken pamiliada.

Naibangon ‘tay metten ti maus-usar itan a Daycare Center para iti 39 a barangay ditoy Bauang nga agserserbi kadagiti 1,151 nga ubbing. Naipaayan ‘tay met ti tulong-medikal iti 127 a marigrigat a pasiente a nakaaramatan iti pundo a Php 276,012.00 ken nasurok 130 a nakurapay a pamilia iti naikkan –tulong a “burial assistance” tapno maidulinda a naimbag ti pimmusay nga ay-ayatenda iti biag, ket ditoy nausar ti pundo a Php 651,000.00. Agdagup iti 254 dagiti indibidual a naiyawatan iti ‘emergency assistance’ iti sidong ti Aid to Individuals In Crisis Situation (AICS) ken uppat (4) a benepisario ti naipaayan ti Emergency Shelter Assistance.


Itay napan a tawen, 2,249 dagiti pamilia nga aktibo a miembro iti Pantawid Pamilyang Pilipino Program (4Ps), apagapaman laeng a ngimmato ti bilangda no maidasig idi 2013. Dimmanon iti Php 21,063,900.00 ti naited a ‘grant cash out’ kadakuada tapno laeng mapasayaat ti panagbiagda. Agdagup met iti 780 a Noche Buena packages iti naited kadagiti benepisario iti 4Ps kas paset iti tinawen a Pamaskong Handog ti LGU.


Dagiti proyekto nga adda iti sidong ti BUB CY2014 a pinundoan ti DSWD ket pakaibilangan iti Sustainable Livelihood Program nga aggatad iti nasurok Php1-Million, ti konstruksion iti dua (2) a Day Care Centers iti Brgy. Pilar ken Upper San Agustin, ken iti panag-sanay dagiti Day Care Workers.

Inangay ti lokal a gobierno iti maysa nga inter-agency consultative conference maipanggep kadagiti lugar a mabalin a pagbalayan para kadagiti umili nga awanan ti babbalay wenno dagiti maawagan nga informal settlers. Nakidanggay iti daytoy a komperensia dagiti mangibagi iti Housing and Urban Development Coordinating Council (HUDCC), Department of Environment and Natural Resources (DENR) ken Habitat for Humanity.


Naala met ti serbisio iti maysa nga consultant para iti ‘informal settlement’ tapno isayangkat ti maysa a survey para kadagitoy nga ‘settlers’. Naaramid dagitoy nga aktibidades tapno masuportaran ti panangipaay iti babbalay ken daduma pay a kasapulan dagiti umili nga awanan pay iti pagtaengan.


Iti baet ti panangpagtalinaed tayo ti agnanayon a kina-aktibo ti Municipal Disaster Risk Reduction Management Council ken iti naan-anayas nga implementasion dagiti amin a plano iti sidong iti MDRRMC, awan iti nailista tayo a dadakkel a dadael iti sanikua, produkto ken inprastraktura manipud iti bagyo ken dakes a panawen. Tapno masaganaan dagiti didigra a kas iti ‘gingined’ ken ‘tsunami’ , adda iti naangay a tsunami ken earthquake drill nationwide idi Marso itay napan a tawen ket maysa ti Bauang a nakipartisipar iti daytoy. Naimatangan ditoy ti kabaelan dagiti estudiante iti elementaria nga agsagana no adda dagitoy a kalamidad.


Dagiti personnel iti LGU a nadutokan a Bantay-Dagat ket nabilinda metten a tumulong no dumteng iti emergency situation, partikular iti igid ti baybay. Adda met dagiti nakasagana nga speedboat ken motorboat a maaramat inkaso nga adda iti sumangbay a layus. Naibunong metten kadagiti barangay dagiti life saving equipment ken adda dagiti barangay nga isuda a mismon iti gimmatang ti usarenda kas panagsagana iti aniaman a kalamidad.


Idi Pebrero 13, 2015 imparang ti United Technologies Consolidated Partnership ken iti Department of Public Works and Highways iti feasibility study maipanggap iti Bauang River Basin. Iti daytoy nga aktibidad, naipakita iti wagas tapno maliklikan ti nakaru a panaglayos kadagiti barangay nga asideg iti karayan. Babaen iti daytoy nga panag-adal, nalaklakan nga i-endorso tayo ti ania man a proyekto maipapan ti panaglayus idiay gobyerno national tayo tapno makadawat ti naan-anay nga pundo.
Pinapigsa iti lokal a gobierno ti serbisio mainaig iti panangidur-as ti ekonomia babaen ti agtultuloy a panangsuporta iti serbisio ti agrikultura ken produksion iti ikan. Dagitoy a dua a sektor iti ‘kaskenan’ a pagtataudan dagiti kangrunaan a kasapulan iti tunggal Bauangenio.


Ma-implementar iti sidong ti Bottom Up Budgeting Program dagiti proyekto a kas iti panangikabil iti 300 artificial reefs iti innem (6) a barangay a masarakan iti igid ti baybay kas iti Pilar, Taberna, Pagdalagan Sur, Baccuit Norte, Paringao ken Baccuit Sur; produksion iti Organic fertilizer babaen iti Vermi-Composting Project idiay Brgy. Palugsi-Limmansangan ken Cabalayangan a naponduan iti Php 1-Million ken panangtarimaan iti Bagbag-Urayong Communal Irrigation System ken Cabalangayan Small Water Impounding Project.


Pinonduan met ti Department of Trade and Industry (DTI) ti proyekto ti gansilyo ken labtang weaving project. Uppat (4) a bilog ken ram-ramit iti panagkalap manipud iti Department of Labor and Employment (DOLE) iti naited para kadagiti mangngalap tapno manayonan ti birokda.


Nautuben ti Bauang a kas maysa a sentro ti panagproseso ti carabao mango babaen ti Mango Growers Association a kas benepisyaryo. Maysa daytoy a proyekto ti Probinsya ti La Union a ponduan ti World Bank. Babaen iti daytoy a wagas, matulungan dagiti agmulmula ti manga, makaited ti pagbirokan ken mangitandudo ti Bauang a kas “Fruit Basket of the North.”


Kasapulan ti panangi-kampania iti panag-komersio, negosio ken industria agsipud ta dagitoy iti napigsa nga adigi iti panagrang-ay ken progreso iti ili tayo. Mainaig iti daytoy, ngimmato iti nailista a bilang dagiti naikkan iti business ken working permits ken agtultuloy met ti panagadu ti bilang dagiti establisiemento iti negosio manipud iti 1,864 nagbalin itan a 1,921.


Pagyamanan iti KrisTV, naaddaan tayo ti nalawa’t sakupna a promosion babaen ti media ditoy ken iti intero a lubong a makaigapu no apay nga adu a turista manipud iti agduduma a luglugar iti intero a pagilian a bumisbisita ditoy Bauang. Inaldaw, nangruna no kawadwadanna (peak season), adu dagiti grupo ken pamilia ti mapmapan agpasiar iti “grape and fruit farms” tapno mapadasanda ti agpuros ti presko a prutas. Malaksid iti Kris TV, nakidanggay tayo met iti national ken regional travels, tour and trade expositions, kas iti ‘Tara na sa Norte’, NorthPhil Expo, Rimat ti Amianan ken Paboda: Kasalan sa La Union ken La Union Travel and Tour Expo, tapno maipakita tayo, saan laeng a dagiti atraksion iti turismo, ngem ketdi uray pay dagiti naidad-daduma a produkto iti panaggantsilyo ken uray pay dagiti pagaayat tayo a prutas.


Itay napan a tawen, nakaawis ti “Panagkakararrua Festival” iti agarup 7,000 a sangaili manipud uneg ken ruar ti munisipio, pakaibilangan dagiti ganganaet (foreigners).
Agpayso a naka-gastos tayo iti Php140,000.00 para iti daytoy a promosion ken daduma pay nga aspeto iti festival, ngem nagbunga iti dakkel gapu iti ‘kanayunan’ nga ‘income’ a nagun-od dagiti negosio iti downtown Bauang ken uray pay kadagiti vendors. Malaksid iti tinawen a Baggak Festival a naigiddan iti panangrambak iti panawen ti Paskua (Christmas), thanksgiving, culture and arts, naisayangkat tayo iti Summer Sports Festival a kas maysa nga aktibidad para iti turismo. Itrab-trabahotayo iti panangbuangay iti ‘nasalun-at a komunidad’ babaen ti panangital-o iti ‘sports’ ken nasalun-at a panagbiag.


Inrubbuat tayo met ti 1st Rediscover Bauang Eco-Trail Run kabayatan ti Baggak Festival a nakitinnarayan ti adu a ‘runners’ ken uray dagiti saan a ‘runners’ tapno mapadasanda iti kabar-baro a klase iti pinakigasan-gasat (adventure). Ita a tawen, inrubbuat ti Department of Tourism(DOT) ti #visitphilippines campaign, ken para kadatayo, i-promote tayo ti Bauang a kas kapipintasan a destinasion para iti beach, mountain ken summer activities babaen ti panangipaay iti aktibidades a para pamilia, nasalun-at, naragsak ken environment-friendly.


Nakipartisipar, naki-partner ken sinuportaran tayo ti pribado a sektor iti panangi-promote iti bukodda nga aktibidades mainaig turismo kas iti Oktoberfest ken tinawen a Chili Cook Off a pabpaborito dagiti lokal ken ganganaet a sangaili manipud iti agduduma a luglugar tapno agtitipon ken agragsakda bayat kadagitoy a festival.
Aggatad iti Php 25,044,444.81 ti pakabu’klan dagiti proyekto inprastraktura. Php 7,152,836.23 ti naggapu iti 20% Development Fund, Php 9,875,673.04 ti nagtaud iti Special Education Fund (SEF) ken Php 8,015,935.54 manipud iti General Fund.


Maibilang kadagiti daduma a dadakkel a proyekto- infrastraktura ti konstruksion iti kongkreto a Santiago Bridge, Payocpoc Norte Oeste ken Payocpoc Norte-Este farm to market roads a naponduan iti Php 2-Million babaen ti Department of Agrarian Reform (DAR) iti sidong ti Bottom-up Budgeting Program CY2014, maysa a classroom building idiay Eulogio de Guzman, Jr. Memorial Elementary School, Pagdalagan Sur; Flood Control project idiay Lossoc Creek, Paringao; Quinavite Multi-Purpose covered court; Central East flood control; ken ti streetlighting project.


Maysa tayo kadagiti sumagmamano a munisipalidad ditoy probinsia iti La Union a nakabukel ken nag-endorso iti biang ti National Solid Waste Management Board-DENR, ti 10 a tawen nga Ecological Solid Waste Management Plan para iti 2014-2023. Nagatang tayon iti 4-hectare a lote para ti panangibangon ti Sanitary Land Fill a kaasideg ti agdama a pagbasuraan (controlled dumpsite) nga isu iti pakaibangonan ti nasao a pasilidad. Dakkel ti panagkasapulan ita a mapapigsa ti kampania seknan iti maiyannatop a ‘waste segregation ken panangipatungpal iti naputar nga ordinansa a panakaiparit ti pagusar iti plastic bags para kadagiti dry goods. Dawatek ngarud iti biang ti sektor iti negosio, agraman dagiti establisiemento nga agserserbi para iti turismo, restaurants, eateries ken dagiti aglaklako a suportaranyo dagitoy nga addang a mangsalaknib iti aglawlaw. Ipaayan tayo ti insentibo dagiti natulnog mangipatpatungpal iti Ordinansa a mamagtignay ken mamaggunay iti amin a sektor agturong iti maysa a nadalus nga ili a Bauang.


Adda met iti pakabuk’lan a 5 nga ektaria a mangrove plantation a masarakan idiay Parian Oeste-Pudoc, maysa a pagbirokan dagiti mangalap ken pamiliada ti panagmulada iti mangrove iti nasao a plantasion. Nagbibinnuligan daytoy a proyekto ti BFAR, DENR, Tanim Kalikasan, ken Bauang Fishing Group Consumers Cooperative tapno maaywanan dagiti naimula a ‘mangroves’. Paset ti nasao a lugar ti 133 nga ektaria a maisingsingasing a maaramat nga ekspansion iti programa ti turismo.


Kayat ko nga alamanuen ken kablaawan amin dagiti “top performing barangays” gapu iti naruay a panagtignay ken panangipakat iti inisiatibo yo para iti “Search for Cleanest, Greenest and Safest Barangay” ti nangipaay iti dakkel a kontribusion iti arapaap tayo nga ipaayan ti nadalus ken nasalun-at nga aglawlaw dagiti umili. Itan, dawatek kadakayo Apo a Punong Barangays a susteniren ken mantenirenyo ti naruggianyo a determinasion ken inisyatibo uray nalpasen ti Search.


Malaksid kadagitoy a barangay, mapadayawanak a mangbigbig kadagiti ‘top performing PTA’ manipud iti Inter-School Search for Best Forest pakaibilangan ti Paringao, Boy-utan ken San Agustin Elementary Schools; Quinavite ken Guerrero Elementary Schools para iti Best Urban Garden; ken Bawanta National High School kas Best Tree Park. Uray ubbing pay dagiti annak tayo, iraman ‘tay ida iti ‘greening program’ wenno panagmula iti kaykayo, saan laeng nga iti eskuelaan ngem ketdi iti arubayan ti babbalay. Aramiden ‘tay a produktibo iti kada espasyo ti arubayan babaen ti panagmula kadagiti kayo nga agbunga iti makan a prutas.


Kasapulan iti ‘Good Governance’ para iti naballaigi nga implementasion ti linteg, proyekto, reporma iti ekonomia ken tapno agtultuloy iti talna, progreso ken panagdur-as iti Bauang. Masapul nga adda kadatayo dagiti kangrunaan a prinsipio iti ‘good governance’ ken nagun-od daytoy babaen iti panagtimpuyog ti Local Government Unit ken Non-Government Organization (LGU-NGO partnership) kaduada dagiti aktibo a civil society organization (CSOs).


Napasnek iti panagtrabahotayo ken amin dagiti aktibidades, proyekto ken dagiti programa iti ili, agraman dagiti gastos, napastrekan ken resulta iti nagbanbannogantayo ket para iti impormasion ti publiko kas paset iti mandato kadakami nga agpai-sidong iti transparency ken accountability. Malaksid iti nakaugalian a ‘transparency boards’ a masarakan kadagiti nalayang a lugar, adda ti website ken social media networks para iti impormasion, panagipadamag ken panagkolekta iti re-aksion ken komento. Iti agdama, nasuroken a 8,000 a Bauangenios ken uray saan a taga-Bauang ti paset iti opisial a ‘facebook community’ tayo.


Sipapannakkel ken naragsakak a mangipakaammo kadayo a manipud idi impaiggemyo kaniak ti liderato iti ili idi 2010, nagbalinen nga host dagiti amin 39 a barangay iti binulan a GABAY, maysa kadagiti flagship programs iti ili. Idi 2014, walo (8) a barangay ti nakaangayan iti GABAY a nang-kompleto iti panagbalin nga host dagiti 39 a barangay iti daytoy a programa. Nadanontayo met iti 11 a barangay a nakaaramidan ti “Pulong-pulong”, kampania para iti impormasion ken pangalaan iti reaksion ken komento (feedback) manipud kadagiti agnanaed iti barangay.


Nagbalin met ti Bauang a lugar a nakaangayan iti Lakbay –Aral ti LGU-Macalelon, Quezon, dagiti opisyal ken miyembo ti MDRRMC iti Norzagaray, Bulacan ken Council members iti Imelda Village idiay Baguio City. Inadalda manipud iti LGU ti Bauang dagiti nadur-as a wagas nga ar-aramiden tayo iti tay-ak ti agrikultura, panangimaton iti kalamidad, sanitasion, kannawidan a panangsalaknib ken panangpadur-as iti aglawlaw wenno environment.


Mapadayawan unay ti ili a Bauang ta nagbalin a benepisario iti ‘grants’ ken tulong pinansial a binanag iti naballaigi a panagtrabaho wenno satisfactory performance nga impakitatayo, dakami nga opisyales yo ken dagiti mapagwadan a kabinnuligmi (partners) iti panangibangon ti maysa a nasyon. Ti Bauang iti benepisario ti 2014 Sagana at Ligtas na Tubig sa Lahat (Salin-Tubig) Program iti DILG babaen ti panakai-pasdek ti level ll water system idiay Barangay Sta. Monica nga aggatad iti Php 2-Million.


Pondo wenno finances iti maipangpangruna no panangipataray iti gobierno-lokal iti pagsasaritaan, nangruna iti panangidanon iti kangrunaan a serbisio kadagiti umili. Babaen ti tulongyo, nakapastrek ti ili tayo iti pakabuk’lan a Php183, 112,144.46. Ngimmato iti napastrekan ti LGU iti Php 23,254,360.83 iti nagbaetan ti 2013 ken 2014, particular iti Tax Revenues ken Internal Revenue Allotment.


Nagtultuloy met ti panag-ngato iti mapaspastrekan manipud kadagiti maawagan a ‘locally-sourced revenues’ a kas iti real property taxes, regulatory fees, dagiti napastrekan manipud negosio ken serbisio, ken daduma pay a nakolekta manipud kadagiti napudno a taxpayers. Iti nagbaetan ti 2013 ken 2014, ngimmato dagiti napastrekan–lokal iti 16.10% wenno pakabuk’lan a Php 11,283,628.83, nangatngato ngem iti 12.59% a nai-record iti nagbaetan ti 2012 ken 2013.

Iti pakabuk’lan a regular income, 44.43% ti nagtaud manipud iti local sources idinto a naggapu met ti nabatbati pay a 55.57% iti Internal Revenue Allotment. Mangipakita laeng daytoy a nababa iti ‘dependency rate’ wenno panagdepender iti external revenue sources.


Iti sabali a bangir, ti pakabuk’lan a gastos (expenditures) ti LGU, dimmanon iti gatad a Php 177,956,410.28. Php 70,384,258.65 wenno 39.55% iti nausar para iti sueldo ken daduma pay a benipisio dagiti empleado iti ili a mangidandanon iti serbisio para kadagiti umili. Saan tayo a limmabes iti 45% ceiling wenno maximum amount iti expenditures para iti first class municipalities.


Nalabit a nang-nangueganyon dagiti isyu seknan iti ‘loans’ ken daduma pay nga utang ti LGU tayo. No ikonsiderar ti napastrekan, ikumpara iti immadu a gastos, awan pay iti kapasidad ti LGU nga ag-implementar kadagiti dadakkel a developmental projects nga agkasapulan iti nawadwad a pundo. Isu nga agdep-depender tayo iti loan wenno pautang. Saan tayo met ketdi nga agmaymaysa. Kaaduanna, no diketdi amin a gobierno-lokal, pinilida ti manggun-od iti loans tapno gastosan dagiti ipang-pangrunada a proyekto.


Idi 2014, nakagastos ti LGU tayo iti 9.4% manipud iti regular income a nagtaud iti locally sourced revenue ken IRA a panangbayad iti utang. Adayo a nababbaba daytoy ngem iti 20% a limitasion nga intuding iti Local Government Code of 1991.

Nausar tayo ti Php 59,017,802.32 kadagiti priority projects iti sidong dagiti sumaganad:
-Health and Nutrition
-Environmental Management
-Infrastructure Projects
- Projects and activities promoting and protecting the welfare of children, elderly and persons with disability
-Assessment Services
-Tourism Promotions and Sports Development
-Poverty Reduction Projects
-Disaster Risk Reduction and Management
-Human Resource Development
-Agriculture and Fisheries Development
-Philhealth for Indigents

Namnamaenyo a dakami a lider yo ket agtaginayon sumurot ken agtungpal iti prinsipio ti ‘accountability’ ken napudno a panagituray.


Tapno makapataud tayo iti ad-adu ken supisiente a pondo para kadagiti proyekto tayo a mangkissay ti parikut ti kinakurapay, kasapulan iti napusgan a panagkolekta iti real property taxes imbes nga iti naisingasing a panangbaliw iti panagbuwis manipud iti Provincial Government nga isu pay nayon a pakaseknan dagiti taxpayers. Isingasingko iti “status quo” iti amin nga agdama nga RPTA, business permits ken licensia. Ngem, kiddawek ti kooperasionyo babaen ti natulnog a panagbayad iti obligasiontayo.


Kabayatan iti inkam panangitul-tuloy ti rebbengenmi a kas tinalekyo nga opisyales, i-trabahomi ti panangitungpal kadagiti sumaganad a programa ken proyekto:

Rediscover Bauang – Fruit Basket and Beach Capital of the North

ECONOMIC DEVELOPMENT
MORE BUSINESS MORE JOBS!

SOCIAL DEVELOPMENT
NO TO POVERTY!

ADMINISTRATIVE GOVERNANCE
YES TO SEAL OF GOOD LOCAL GOVERNANCE!!

ENVIRONMENTAL MANAGEMENT
TOWARDS A HEALTHIER BAUANG!
 



Add this page to your favorite Social Bookmarking websites
 
 
joomla templateinternet security reviews
Municipality of Bauang, La Union. Copyright 2017. All rights Reserved.
Technology template by best internet security Developed by Reyden and Dexter Maintained by the Office of the Municipal Administrator